മതമനുഷ്യൻ : ആന്ത്രോസെമിറ്റിസം

മതമനുഷ്യൻ

സാമൂഹ്യശാസ്ത്രത്തിൽ ഒരു കൂട്ടം തത്വങ്ങളും അതിനനുസരിച്ചുള്ള ജീവിതക്രമവുമാണ് മതം.

ഒരു അതിമാനുഷ ശക്തിയിലുള്ള വിശ്വാസവും ആരാധനയുമാണ് മതം എന്നും നിർവ്വചിക്കപ്പെട്ടിട്ടുണ്ട്.

മനുഷ്യന് മതവിശ്വാസം സഹജാവബോധമാണെന്ന്  നരവംശശാസ്ത്രജ്ഞർ നിരീക്ഷിച്ചിട്ടുണ്ട്.

 Religion is the belief in and worship of a super human power or powers especially a  God or gods.

അറിയപ്പെട്ട മനുഷ്യനാഗരികതകളിലെല്ലാം അദൃശ്യശക്തികളിലുള്ള വിശ്വാസം ഉണ്ടായിരുന്നു.

ഒന്നിലേറെ ദൈവങ്ങളിൽ വിശ്വസിച്ചിരുന്ന സമൂഹങ്ങൾക്കും എല്ലാറ്റിനും മീതേയുള്ള പരമേശ്വര സങ്കൽപ്പം ഉണ്ടായിരുന്നു.ഒന്നാമത്തെ മനുഷ്യൻ ഏകദൈവവിശ്വാസിയായ ആദം ( അ ) എന്ന അല്ലാഹുവിൻ്റെ പ്രവാചകനായിരുന്നുവെന്നും പിന്നീട് സ്വാർത്ഥംഭരികളായ മനുഷ്യർ ആദം ( അ ) പരിചയപ്പെടുത്തിയ അടിസ്ഥാന മതത്തെ ബഹുദൈവവിശ്വാസമടക്കമുള്ള രീതികളിലേക്ക്

ദുർവ്യാഖ്യാനിക്കുകയുമായിരുന്നുവെന്ന ഇസ്‌ലാമിക ദർശനത്തെ ശരിവെക്കുന്നതാണ് നരവംശചരിത്രം.

അമേരിക്കൻ മന:ശാസ്ത്രജ്ഞനായ Justin L. Barret മതവിശ്വാസം ജന്മാർജ്ജിത ഗുണമാണെന്ന് നിരീക്ഷിക്കുന്നു.  തനിക്കും താൻ അനുഭവിക്കുന്ന പ്രപഞ്ചത്തിനും കാര്യകാരണങ്ങൾ സംവിധാനിക്കുന്ന ഒരു ശക്തി ഉണ്ടാകണം എന്നത് ഏതൊരു വ്യക്തിയുടെയും Intution അഥവാ അന്ത:പ്രജ്ഞയാണ്.

Born Belivers : The Science of Childhood Religion എന്ന അദ്ദേഹത്തിൻ്റെ കൃതി ലോക പ്രശസ്തമാണ്.

പ്രപഞ്ചനാഥനിലുള്ള വിശ്വാസം സഹജാവബോധമാണെന്ന് സൂചിപ്പിക്കുന്ന രണ്ട് ഖുർആനിക വചനങ്ങൾ പരിചയപ്പെടാം .

وإذ أخذ ربك من بني آدم من ظهورهم ذريتهم وأشهدهم على أنفسهم ألست بربكمۖ قالوا بلى شهدنا أن تقولوا يوم القيامة إنا كنا عن هذا غافلين [الأعراف:172]

ഭൂമിയിലേക്ക് വരുമ്മുമ്പേ ആത്മാക്കളുടെ ലോകത്ത് വെച്ച് നടന്ന കൂടിക്കാഴ്ച്ചയിൽ ആദം സന്തതികളെല്ലാവരും അല്ലാഹുവിൻ്റെ രക്ഷാകർതൃത്വം അംഗീകരിച്ചിരുന്നുവെന്നാണ് വചനത്തിൻ്റെ താൽപര്യം.

فَأَقِمْ وَجْهَكَ لِلدِّينِ حَنِيفًا ۚ فِطْرَتَ اللَّهِ الَّتِي فَطَرَ النَّاسَ عَلَيْهَا ۚ لَا تَبْدِيلَ لِخَلْقِ اللَّهِ ۚ ذَٰلِكَ الدِّينُ الْقَيِّمُ وَلَٰكِنَّ أَكْثَرَ النَّاسِ لَا يَعْلَمُونَ [الروم:30]

അല്ലാഹു മനുഷ്യരിൽ സംവിധാനിച്ച നൈസർഗികഭാവമായ മതത്തെ ഋജുമനസ്ക്കരായി വരിക്കുവാൻ മുകളിലെ വചനം ആഹ്വാനം ചെയ്യുന്നു.

ദിവ്യസൃഷ്ടമായ പ്രസ്തുത മനോഘടനക്ക് മാറ്റം സാധ്യമല്ലെന്ന് വചനം കൂട്ടിച്ചേർക്കുന്നു .

എന്താണ് സഹജാവബോധം ?

അന്ത:പ്രജ്ഞ (Intution) എന്ന ആശയം നാം നേരത്തെ പരിചയപ്പെട്ടു. പഞ്ചേന്ദ്രിങ്ങൾക്ക് ഗോചര്യമല്ലാത്ത അസ്തിത്വങ്ങളിലും യാഥാർത്ഥ്യങ്ങളിലും വിശ്വസിച്ച് കൊണ്ടല്ലാതെ മനുഷ്യന് പ്രപഞ്ചവായന പൂർണ്ണമാക്കാനാവില്ല. ചില സത്യങ്ങൾ അനുഭവപരമായ തെളിവുകളോ ( Emperical evidence ) കൂലങ്കശമായ യുക്തിവിചാരമോ ( Logical Reasoning ) കൂടാതെ അനിഷേധ്യമായി ഏത് മനുഷ്യനും അംഗീകരിക്കാൻ പ്രകൃത്യാ നിർബന്ധിതരാണ്. അത്തരം കാര്യങ്ങൾ കണ്ടെത്താനുള്ള സിദ്ധിയാണ് അന്ത: പ്രജ്ഞ .

Intution is having an ability to understand something instinctively without the need conscious reasoning.

ഇതിനെ , ഏറ്റവും പ്രകൃതിദത്തമായ ഒരു സത്യാന്വേഷണമാധ്യമമായി ആധുനിക തത്വശാസ്ത്രം അംഗീകരിച്ചിട്ടുണ്ട്. Selfvalid truth , Axioms , lnference തുടങ്ങിയ ഗണിതശാസ്ത്രം , ഭൗതികശാസ്ത്രം അടങ്ങുന്ന പഠനമേഖലയിൽ സർവാംഗീകൃതമായ തെളിവുകൾ നിലക്കൊള്ളുന്ന അടിസ്ഥാനം intution തന്നെയാണ്.

ഇസ്ലാം ; ലഘുപരിചയം.

അല്ലാഹുവിൻ്റെ അരികേ സ്വീകാര്യമായ ഏകമതം എന്ന് ഇസ്‌ലാമിനെ കുറിച്ച് പ്രാഥമിക ക്ലാസുകളിൽ പഠിച്ചത് നിങ്ങൾ ഓർക്കുന്നുണ്ടാവും . എന്നാൽ മനുഷ്യകേന്ദ്രീകൃത വായനക്കപ്പുറം കുറച്ചുകൂടെ വിശാലമായി ചിന്തിക്കാൻ ഇപ്പോൾ നിങ്ങൾക്കാവും.പ്രപഞ്ചത്തിൻ്റെ നൈസർഗികമായ സ്വാഭാവിക താളമാണ് ഇസ്ലാം എന്ന് പറയാം. അല്ലാഹു ഒഴികേയുള്ള ബാക്കിയെന്തൊക്കെയുണ്ടോ അവയുടെ പേരാണ് പ്രപഞ്ചം.9600 കോടി പ്രകാശവർഷം ഡൈമീറ്റർ വലിപ്പവും 1350 കോടി വർഷം വയസ്സുമാണ്ടെന്ന് അനുമാനിക്കപ്പെടുന്ന ദൃശ്യപ്രപഞ്ചത്തിലെ കോടാനുക്കോടി പദാർത്ഥങ്ങളിൽ ഒന്നാണ് ജൈവികവും - ആത്മീകവുമായ സ്വത്വമുള്ള മനുഷ്യൻ . കേവലം ആ മനുഷ്യന് മാത്രമുള്ള നിയമസംഹിതയോ വ്യവസ്ഥയോ അല്ല ഇസ്ലാം.  മഹാഗോളങ്ങൾ , നക്ഷത്രങ്ങൾ , ഉൽക്കകൾ , കൊള്ളിമീനുകൾ , പാറക്കല്ലുകൾ , പർവ്വതങ്ങൾ , സമുദ്രങ്ങൾ , മരങ്ങൾ , സസ്യങ്ങൾ ,  മൃഗങ്ങൾ , കണങ്ങൾ , കണികൾ തുടങ്ങി സ്ഥൂലവും സൂക്ഷ്മവുമായ എല്ലാ വസ്തുക്കളും അല്ലാഹു എന്ന തങ്ങളുടെ നാഥന് സങ്കീർത്തനം ചൊല്ലിയും സാഷ്ടാംഗം ചെയ്തും പ്രാർത്ഥിച്ചുമാണ് നിലക്കൊള്ളുന്നത് എന്ന് വിശുദ്ധ ഖുർആൻ പറയുന്നു. പ്രപഞ്ചമഖിലം ഇസ്ലാം എന്ന അല്ലാഹു സംവിധാനിച്ച താളത്തിനകത്താണെന്ന ഈ കാഴ്ച്ചപ്പാടാണ് ഇസ്ലാമിൻ്റെ പ്രാപഞ്ചികവീക്ഷണത്തിൻ്റെ (Islamic Cosmological View) മർമ്മം. ഇവ്വിധം , മനുഷ്യൻ്റെ യുക്തിവിചാരത്തിന് സംതൃപ്തി നൽകുന്ന ഏക ദർശനമാവുന്നു.

കാരണം  പ്രപഞ്ചം ,പ്രകൃതി മനുഷ്യൻ , ജീവിതം ഇവയെപ്പറ്റിയെല്ലാമുള്ള കൃത്യമായ വീക്ഷണം ഇസ്ലാമിനുണ്ട് . മനുഷ്യനെ പ്രകൃതിയിൽ നിന്നും പ്രപഞ്ചത്തിൽ നിന്നും അടർത്തി മാറ്റാതെ സൃഷ്ടി ജാലങ്ങൾക്കിടയിൽ വിശ്വാസപരമായ സഹവർത്തനബോധം ഇസ്ലാം മാത്രമേ ലോകപ്രത്യയശാസ്ത്രങ്ങളിൽ നൽകുന്നുള്ളൂ.

inbox : മുകളിൽ പറഞ്ഞ ഇസ്ലാമിൻ്റെ പ്രപഞ്ചവീക്ഷണം (Islamic Cosmological View)ഉരുതിരിഞ്ഞ് വന്ന പ്രമാണങ്ങളിൽ ചിലത് പരിചയപ്പെടാം .

تُسَبِّحُ لَهُ السَّمَاوَاتُ السَّبْعُ وَالْأَرْضُ وَمَن فِيهِنَّ ۚ وَإِن مِّن شَيْءٍ إِلَّا يُسَبِّحُ بِحَمْدِهِ وَلَٰكِن لَّا تَفْقَهُونَ تَسْبِيحَهُمْ ۗ إِنَّهُ كَانَ حَلِيمًا غَفُورًا ( الإسراء 44)

സപ്താകാശങ്ങളും ഭൂമിയും അവയിലുള്ളവയും അല്ലാഹുവിന് സങ്കീർത്തനം ചെയ്യുന്നു. അല്ലാഹുവിന് സ്തോത്രങ്ങൾ ഉരുവിട്ടുകൊണ്ടല്ലാതെ ഒരുവസ്തുവും നിലനിൽക്കുന്നില്ല. പക്ഷെ നിങ്ങൾ ( മനുഷ്യർക്ക് ) അവയുടെ സങ്കീർത്തനം മനസ്സിലാവില്ല. നിശ്ചയമായും അല്ലാഹു സഹനശീലനും പൊറുത്തുകൊടുക്കുന്നവനുമാകുന്നു.

سَبَّحَ لِلَّهِ مَا فِي السَّمَاوَاتِ وَالْأَرْضِ ۖ وَهُوَ الْعَزِيزُ الْحَكِيمُ (الحديد 1)

ആകാശഭുവനങ്ങളിലുള്ളവയെല്ലാം അല്ലാഹുവിന് സങ്കീർത്തനം ചെയ്തിരിക്കുന്നു . അവനത്രെ പ്രതാപിയും വിധികർത്താവും .

أَلَمْ تَرَ أَنَّ اللَّهَ يُسَبِّحُ لَهُ مَن فِي السَّمَاوَاتِ وَالْأَرْضِ وَالطَّيْرُ صَافَّاتٍ ۖ كُلٌّ قَدْ عَلِمَ صَلَاتَهُ وَتَسْبِيحَهُ ۗ وَاللَّهُ عَلِيمٌ بِمَا يَفْعَلُونَ

താങ്കൾ മനസ്സിലാക്കിയിട്ടില്ലേ : ആകാശഭൂമിയിലുള്ളവയെല്ലാം അല്ലാഹുവിനെ വാഴ്ത്തുന്നു. പക്ഷങ്ങളിൽ പാറുന്ന പറവകളും . എല്ലാവരും അതിൻ്റേതായ നമസ്ക്കാരവും തസ്ബീഹും അറിഞ്ഞിരിക്കുന്നു. അവകൾ ചെയ്യുന്നത് അല്ലാഹു നന്നായറിയും.

പ്രപഞ്ചത്തെ കുറിച്ച് മൂന്ന്  ധാരണകൾ നമുക്കിപ്പോൾ കിട്ടി.

ഒന്ന് : അനന്തമജ്ഞാതമവർണ്ണനീയമായ ഈ മഹാശിൽപ്പവും അതിലടങ്ങിയ പ്രാതിഭാസിക വൈവിധ്യങ്ങളും അല്ലാഹു എന്ന നിമിത്തത്തിൻ്റെ ഏകത്വത്തെ കുറിക്കുന്നു .

രണ്ട് : പ്രപഞ്ചത്തിലെ തരു മുതൽ താരങ്ങൾ വരെ നാം മുസ്ലിംകളെ പോലെ അല്ലാഹുവിന് ആരാധിച്ച് നിലക്കൊള്ളുന്നു.

മൂന്ന് : അവിശ്വാസം ( കുഫ്റ് ) മനുഷ്യരിലും ഭൂതങ്ങളിലും ( ജിന്ന് ) മാത്രമേ ഉള്ളൂ. അതായത് , ഒരു വ്യക്തിയോ ഭൂതമോ അല്ലാഹുവിനെ നിഷേധിക്കുകയാണെങ്കിൽ ആ കക്ഷി പ്രാപഞ്ചിക പ്രവാഹത്തിൽ നിന്നും താളം തെറ്റി എന്നർത്ഥം

നിങ്ങൾക്ക് ചോദിക്കാം .

പ്രാപഞ്ചിക പ്രതിഭാസങ്ങളെ തത്വശാസ്ത്രത്തിൻ്റെ  ഘടകങ്ങൾ ചേർത്ത് മതപരമായി വായിക്കുന്ന പ്രവണതക്ക് അക്കാദമിക പിന്തുണ ഉണ്ടാവുമോ ?

ഫ്യൂച്ചറിസ്റ്റും ഭൗതികശാസ്ത്രജ്ഞനുമായ മിച്ചിയോ കാക്കു MICHO KAKU വിൻ്റെ THE GOD EQUATION : The Quest for a Theory of everything എന്ന കൃതി തത്വശാസ്ത്രത്തെയും ഭൗതികശാസ്ത്രത്തെയും സംലയിപ്പിക്കുന്ന GRAND UNIFIED THEORY മുന്നോട്ട് വെക്കുന്ന വിദ്യുൽശ്രമമാണ് .

പ്രശസ്ത ബ്രിട്ടീഷ് ഫിലോസഫറും ആദ്യകാലത്ത് കഠിന നിരീശ്വരവാദിയുമായിരുന്ന ആൻ്റണി ഫ്ള്യു ( Antony Flew ) വിൻ്റെ THERE IS GOD എന്ന കൃതി മറ്റൊരുദാഹരണം.

ഈ ശ്രേണിയിലേക്ക് ചേർക്കാവുന്ന കൃതികളും ഡോക്യു - ഫിക്ഷനുകളും നിങ്ങൾക്ക് കണ്ടെത്താനാവും , ശ്രമിച്ച് നോക്കുക .

പ്രകൃതിമതം :

ഇസ്ലാം പ്രാപഞ്ചികമതമാണ് എന്ന ആശയത്തിൻ്റെ ഭാഗമാണ് ഇസ്ലാം പ്രകൃതി മതമാണ് എന്നത്.

ഇക്കാര്യം മനസ്സിലാവാൻ ഒരു സങ്കൽപ്പം പറയാം.

ഒരു മനുഷ്യന് ഋജുമനസ്ക്കനായി ചിന്തിച്ചാൽ 'നല്ലത് '

( Does ) എന്ന് തോന്നുന്ന കാര്യങ്ങളുടെ പട്ടിക തയ്യാറാക്കിയെന്നിരിക്കട്ടെ , അത്പോലെ

'മോശം ' ( Donots) എന്ന് തോന്നുന്ന കാര്യങ്ങളുടെ പട്ടികയും . മനുഷ്യരാശിയുടെ ആരംഭത്തിൽ ജീവിച്ച വ്യക്തി മുതൽ ഇന്നെത്തി നിൽക്കുന്ന നാഗരികതയിലെ അംഗം വരെയുള്ള വ്യത്യസ്ത ഭൂപ്രദേശങ്ങളിലുള്ള മനുഷ്യരിൽ റാൻ്റം ആയി ഇക്കാര്യം ചെയ്ത് കിട്ടുന്ന പട്ടികയിൽ 'നല്ലത് ' എന്ന കോളത്തിൽ ഏറ്റവുമധികം ആവർത്തിക്കപ്പെട്ട കാര്യങ്ങളെല്ലാം ഇസ്ലാമിലും നല്ലതായിരിക്കും . ' മോശം ' എന്ന കോളത്തിൽ ഏറ്റവുമധികം ആവർത്തിക്കപ്പെട്ട കാര്യങ്ങളെല്ലാം ഇസ്ലാമിലും മോശം ആയിരിക്കും .

മനുഷ്യൻ്റെ നൈസർഗിക പ്രകൃതത്തോട് ഗുണപരമായി ഒത്തുപോവുന്ന ദർശനമാണ് ഇസ്ലാം .

സത്യം , നീതി , കരുണ , മര്യാദ , വിനയം , പരോപകാരം തുടങ്ങിയ മൂല്യങ്ങൾ ഗുണപരവും

അസത്യം , അനീതി , കൊലപാതകം , ഭൗതിക-പദാർത്ഥലഹരി , പലിശ , വേശ്യാവൃത്തി , അഴിമതി തുടങ്ങിയ കാര്യങ്ങൾ ദുർഗുണങ്ങളയും മാത്രമേ എന്നും ഇസ്ലാം എണ്ണിയിട്ടുള്ളൂ.

ഇസ്ലാമിനെ നിരാകരണ മനോഭാവത്തോടെ കാണുന്ന പ്രത്യയ ശാസ്ത്രങ്ങൾ പലതും ആത്മഹത്യയെ മൗലികാവകാശമായും ബാധ്യതാരഹിത ലൈംഗിക ജീവിതത്തെ പുരോഗതിയായും സ്വാർത്ഥതയെ വ്യക്തിസ്വാതന്ത്ര്യമായും എണ്ണുന്നുണ്ട് .

ഇസ്‌ലാമും മനുഷ്യനും .

മറ്റു ജീവികളിൽ നിന്ന് മനുഷ്യനെ വ്യത്യസ്തനാക്കുന്ന പത്ത് സവിശേഷതകൾ കണ്ടെത്താൻ നിങ്ങൾക്കാവുമോ ?

നട്ടെല്ലിൽ നിവർന്ന് നടക്കുന്ന മനുഷ്യൻ ശാരീരികമായി കുറ്റമറ്റ സൃഷ്ടിയാണ്. അതിശക്തമായ ബുദ്ധി ശക്തിയും വിശകലന പാഠവവും യുക്തിവിശകലന ശേഷിയുമാണ് മനുഷ്യൻ്റേത് .

ശാരീരികമായ ആവശ്യങ്ങൾക്ക് പുറമേ ആത്മീകവും ആശയപരവുമായ ആവശ്യങ്ങൾ കൂടി പൂർണ്ണമാവുമ്പോഴേ മനുഷ്യൻ സംതൃപ്തനാവുകയുള്ളൂ.

നമുക്കിങ്ങനെ ചുരുക്കാം ;

മനുഷ്യന് രണ്ട് സ്വത്വങ്ങളുണ്ട് : ജൈവികവും ആത്മീയവും . സാദാരണ ജീവനുള്ള ഏതൊരു വസ്തുവിനും ആവശ്യമുള്ള ഭോജനം , ഭോഗം എന്നിത്യാദി ജീവൽ പ്രക്രിയകളാണ് ജൈവികസ്വത്വത്തിൻ്റെ ആവശ്യം .

എന്നാൽ യുക്തിവിശകലന ശേഷി ഉപയോഗിച്ച് കൊണ്ട് ഒരവസ്ഥയിൽ നിന്നും പടിപടിയായി ബൗദ്ധിക സഞ്ചാരം നടത്തുന്ന ധൈഷണിക പ്രക്രിയകളാണ് ആത്മീക സ്വത്വം .

ഭൂമിയിലെ അല്ലാഹുവിൻ്റെ പ്രതിനിധിയാണ് മനുഷ്യൻ .

അല്ലാഹു നിശ്ചയിച്ചനന്മകളുടെ സാക്ഷ്യമുദ്രകളായി

ജീവിക്കാൻ മനുഷ്യൻ കീർത്തിക്കപ്പെട്ടിരിക്കുന്നു.

ഒന്നാമത്തെ മനുഷ്യനായ ആദം ( അ ) ആണ് ഒന്നാമത്തെ അല്ലാഹുവിൻ്റെ പ്രവാചകൻ . ചിലർ തെറ്റിധരിപ്പിക്കും വിധം മുഹമ്മദ് നബി ( സ്വ ) അല്ല ഇസ്ലാമിൻ്റെ സ്ഥാപകൻ.

സദ്ഗുണങ്ങളാൽ സമ്പൂർണ്ണ മനുഷ്യനായ മുഹമ്മദ് നബി ( സ്വ ) അന്ത്യപ്രവാചകനും സൃഷ്ടികളിൽ അത്യുത്തമനുമാണ്. ഓരോ കാലഘട്ടത്തിലും ഭൂമുഖത്ത് ജീവിച്ച മനുഷ്യനാഗരികതകളിലേക്ക് പ്രവാചകന്മാർ നിയുക്തരായിട്ടുണ്ട് . അതത് മനുഷ്യ സമൂഹത്തിൻ്റെ സാങ്കേതികവും സാക്ഷരപരവും സാഹിതീയവുമായ നിലവാരങ്ങൾക്കനുസരിച്ചുള്ള സവിശേഷതകളുമായാണ് പ്രവാചകന്മാർ പറഞ്ഞയക്കപ്പെട്ടത്. ശാഖാപരമായ കർമ്മ ശാസ്ത്ര വിധികൾ വ്യത്യസ്തമായപ്പോഴും അടിസ്ഥാനപരമായ ഏകദൈവവിശ്വാസവും അതിൻ്റെ വ്യവസ്ഥാ - വകുപ്പുകളും എന്നും ഏകമായിരുന്നു .

in box : മുകളിൽ പറഞ്ഞ രണ്ടുതരം സ്വത്വങ്ങൾ ഉൾക്കൊള്ളുന്ന മനുഷ്യപ്രകൃതം അല്ലാഹുവിൻ്റെ പ്രത്യേക സംവിധാനമാണ് . അതിന് മാറ്റം വരുത്തുക സാധ്യമല്ല .

ഒരു പക്ഷേ , പ്രത്യക്ഷ ഗുണങ്ങളിലോ ലിംഗാവബോധം പോലോത്ത ആന്തരികഭാവങ്ങളിലോ മറ്റു മെറ്റബോളിക് ഘടനയിലോ കൃത്രിമമാറ്റങ്ങൾ വൈദ്യശാസ്ത്രപരമായി വരുത്തിയാലും മനുഷ്യനിലെ ആശയ - ആത്മീക ബോധം മാറ്റമില്ലാതെ ബാക്കിയാവും . വിശുദ്ധ ഖുർആൻ ഉണർത്തുന്നു.

  فَأَقِمْ وَجْهَكَ لِلدِّينِ حَنِيفًا ۚ فِطْرَتَ اللَّهِ الَّتِي فَطَرَ النَّاسَ عَلَيْهَا ۚ لَا تَبْدِيلَ لِخَلْقِ اللَّهِ ۚ ذَٰلِكَ الدِّينُ الْقَيِّمُ وَلَٰكِنَّ أَكْثَرَ النَّاسِ لَا يَعْلَمُونَ ( سورة الروم 30)

അതിനാൽ താങ്കൾ അല്ലാഹുവിൻ്റെ മതത്തിന് വേണ്ടി ഋജുമനസ്ക്കനായി നിലകൊള്ളുക . പ്രസ്തുത മതം എന്നാൽ അല്ലാഹു സംവിധാനിച്ച പ്രാപഞ്ചിക നൈസർഗികതയാണ് . അതിനനുസരിച്ചാണവൻ മനുഷ്യരെ പാക്കപ്പെടുത്തിയത് . അല്ലാഹുവിൻ്റെ സൃഷ്ടിപ്പിന് മാറ്റം വരുത്താനാവില്ല . അതത്രെ അജയ്യമായ മതം . പക്ഷെ മിക്കപേരും അജ്ഞരാണ് .

ഇത്രയും പഠിച്ചതിൽ നിന്നും നിങ്ങൾ ഒരു ചോദ്യത്തിന് മറുപടി പറയാൻ ശ്രമിക്കുമല്ലോ ;

വിവരസാങ്കേതിക സംവിധാനങ്ങൾ പ്രവചനാതീതമായി വികസിച്ച ഇക്കാലത്തും മനുഷ്യർ നൂറ്റാണ്ടുകൾ പഴക്കം ചെന്ന തത്വങ്ങളിൽ തന്നെ വിശ്വസിച്ച് അതിനനുസരിച്ച് ജീവിക്കണമെന്നത് യുക്തിസഹമാവുമോ ?

മനുഷ്യൻ എന്ന ജീവിയിലെ അടിസ്ഥാന ഗുണങ്ങളും ഛോദനകളും ആവശ്യങ്ങളും മാറുന്നില്ല , ഒരിക്കലും  മാറുകയില്ല എന്നതാണ് ഉത്തരത്തിൻ്റെ ആമുഖം .

മാറ്റിവെക്കാൻ പറ്റായ്മയുടെ തീവ്രത അനുസരിച്ച് ശ്വസനംവും ജീവനുമുള്ള മനുഷ്യരുടെ ആവശ്യങ്ങൾ ഇങ്ങനെ വിന്യസിക്കാം.

ഉറക്കം , മൂത്രവിസർജ്ജനം , പാനം , കാഷ്ട വിസർജ്ജനം , അന്നം , വസ്ത്രം , ലൈംഗികത , പാർപ്പിടം , വിനോദങ്ങൾ .

വിനോദങ്ങളെ കല , കായികം , സംഗീതം , ലഹരി എന്നിങ്ങനെയും ശ്രേണീകരിക്കാം . സഞ്ചാരം , യുദ്ധം , കച്ചവടം , കൃഷി , രാഷ്ട്രീയം , വിവാഹം , സാഹസികത തുടങ്ങിയവയെല്ലാം മുകളിലെണ്ണപ്പെട്ട ഛോദനകൾ നിറവേറ്റാനുള്ള പ്രവർത്തനങ്ങളാണ് . സാർവ്വജനീനമായ ഈ മാനുഷസമാനത വൈകാരികമായും വൈചാരികമായും കൂടിയുണ്ട് . ഒന്നാമത്തെ മനുഷ്യനെ കരയിപ്പിച്ച ദുഃഖം ഇന്നത്തെ മനുഷ്യനെയും കരയിപ്പിക്കും . ഇന്നത്തെ മനുഷ്യനെ ചിരിപ്പിക്കുന്ന ഒരു കാര്യം ഒന്നാമത്തെ മനുഷ്യനെയും ചിരിപ്പിക്കുമായിരുന്നു .

മാറാത്ത മനുഷ്യന് ആവശ്യം മാറാത്ത ഗുണപാഠങ്ങളും ജീവിതലക്ഷ്യങ്ങളുമാണ്.

അപ്പോൾ പിന്നെ മാറിയത് എന്താണ് ?

ഉപകരണങ്ങൾ മാറിയിട്ടുണ്ട് , അതിനൊത്ത്  ഉപായങ്ങളുമാണ് മാറിയത് .

കഴുതപ്പുറത്തും കാളവണ്ടിയിലും പോയി നിറവേറ്റിയിരുന്ന ആവശ്യങ്ങൾ ഇന്ന്  മോട്ടോർ വാഹനങ്ങൾ വഴി നടത്തുന്നു . പക്ഷിത്തൂവൽ കൂർപ്പിച്ച എഴുത്താണികളും താളിയോലകളും ചെയ്ത ധർമ്മങ്ങൾ ഇലക്ട്രോണിക് യന്ത്രങ്ങൾ ചെയ്യുന്നു . സാങ്കേതിക സംവിധാനങ്ങൾ മാറുമ്പോൾ ജീവിത രീതികളും മാറും .ഗോത്രകാലമനുഷ്യൻ , മധ്യകാല മനുഷ്യൻ , ആധുനികമനുഷ്യൻ എന്നൊക്കെയുള്ള തരംതിരിവ് മനുഷ്യൻ സഞ്ചരിച്ച ചരിത്രത്തിൻ്റേതാണ് , അല്ലാത്തെ മനുഷ്യൻ്റേതല്ല . വൈദ്യുതിയും ഇൻ്റർനെറ്റുമൊക്കെ ഇല്ലാതായാലും ബാക്കിയാവുന്ന അടിസ്ഥാന ഗുണങ്ങളാണ് മനുഷ്യവംശത്തിൽ  മാനകമായി ബാക്കിയുണ്ടാവുന്ന സവിശേഷതകൾ .

എന്നാൽ , കർമ്മപരമായി ഓരോ നൂതനസാഹചര്യത്തെയും ഉൾക്കൊള്ളാനും സാഹചര്യാനുസാരിയായ ആവശ്യങ്ങളെ അഭിമുഖീകരിക്കാനും പൊതുവായ തത്വങ്ങളും നിദാനശാസ്ത്രവും ഇസ്ലാമിലുണ്ട് .

ഇസ്ലാം : മനുഷ്യനെ നിർവ്വചിച്ച ഏകമതം

രണ്ട് കാര്യങ്ങളാണ് ഈ ഉപശീർഷകത്തിന് ചുവട്ടിൽ നിങ്ങൾ ആലോചിക്കേണ്ടത് .

ഒന്നാമതായി , മനുഷ്യനെപ്പോലെ കൂടുതൽ  മെച്ചപ്പെട്ട ജീവിതരീതി കണ്ടെത്താനായി ഉൽസാഹിക്കുന്ന (Struggle for better life ) മറ്റേതെങ്കിലുമൊരു ജീവിയെ നിങ്ങൾ കേട്ടിട്ടുണ്ടോ?

നിലനിൽക്കുന്ന പ്രാപഞ്ചിക ധാരണകൾ വ്യവസ്ഥാപിതമായി അടുക്കി വെച്ച് വിജ്ഞാനസമ്പാദനവും സ്ഥാപനനിർമ്മാണവും നിയമനിർമ്മാണവും നടത്തുന്ന മനുഷ്യേതര വർഗത്തെ കുറിച്ച് കേട്ടിട്ടുണ്ടോ ?

ഇല്ല എന്നതാവും ഉത്തരം .

മനുഷ്യനേക്കാൾ മെയ്ക്കരുത്തും അംഗസിദ്ധികളുമുള്ള ധാരാളം ജീവികളെ അവൻ മെരുക്കിയെടുത്ത് കീഴ്പ്പെടുത്തുന്നു .

മനുഷ്യൻ ആനയെ താളത്തിൽ ചലിപ്പിക്കുന്നു .

ഇന്നേവരെ കുതിരകളോ കാളകളോ സമ്മേളിച്ച് മനുഷ്യനെ കീഴ്പ്പെടുത്തി അവൻ്റെ ചുമലിൽ നഖം കെട്ടി വാഹനം വലിപ്പിച്ചിട്ടില്ല . ചിന്താർഹമായ ഈ മനുഷ്യമികവിൻ്റെ പ്രകൃതിശാസ്ത്രപരമായ ന്യായം യുക്തിസഹമായി നിരത്താൻ പരിണാമവാദമടക്കമുള്ള ജീവശാസ്ത്രതത്വങ്ങൾക്ക് സാധിച്ചിട്ടില്ല .

ഭൗതികമായ മനുഷ്യ സവിശേഷതകളിൽ ഏറ്റവും പ്രധാനം ഏതാണെന്ന് ചിന്തിച്ചാൽ ഒരു വലിയ സത്യത്തിലേക്കുള്ള കിളിവാതിൽ തുറക്കപ്പെടും .

മനുഷ്യമികവിൻ്റെ ഏറ്റവും വലിയ ഘടകം

ഭാഷ ഉപയോഗിച്ച് കൊണ്ട് ആശയവിനിമയം നടത്താനുള്ള കഴിവാണെന്ന് പറയാം . വിശേഷബുദ്ധിയും യുക്തിവിശകലനവും ഒരുമിക്കുമ്പോൾ മാത്രമാണ് അർത്ഥങ്ങളും ആശയങ്ങളുമുള്ള പദങ്ങൾ വിന്യസിക്കപ്പെടുന്ന ഭാഷകൾ വികസിക്കുക .

ധാരാളം നരവംശശാസ്ത്രജ്ഞരും ജീവശാസ്ത്രജ്ഞരും ഇക്കാര്യം അംഗീകരിക്കുന്നുണ്ട്.

പ്രമുഖ അമേരിക്കൻ എഴുത്തുകാരൻ നോം ചോംസ്കി ( Nam chomsky ) യുടെ ഭാഷയുടെ പരിണാമം സംബന്ധിച്ച പഠനങ്ങൾ വായിച്ചാൽ അക്കാര്യം മനസ്സിലാവും .

in box : ഇവിടെ ഏറ്റവും ശ്രദ്ധേയമായ കാര്യം , മനുഷ്യപിതാവായ ആദം ( അ ) മിൻ്റെ സവിശേഷതയായി അല്ലാഹു എടുത്ത് പറയുന്ന കാര്യം തന്നെയാണ്

وَعَلَّمَ آدَمَ الْأَسْمَاءَ كُلَّهَا ثُمَّ عَرَضَهُمْ عَلَى الْمَلَائِكَةِ فَقَالَ أَنبِئُونِي بِأَسْمَاءِ هَٰؤُلَاءِ إِن كُنتُمْ صَادِقِينَ( سورة البقرة 30)

അഥവാ ആദമിനെ അല്ലാഹു സർവ്വ നാമങ്ങളും പഠിപ്പിച്ചു എന്നാണ്. ആശയപരമായ കാര്യങ്ങളാണ് ( Abstract ) നാമങ്ങൾ . ബന്ധപ്പെട്ട തത്വങ്ങളെ കുറിക്കുന്ന പദങ്ങളാണ് നാമങ്ങൾ ( Names ) . അപ്പോൾ ഭൂമിയിൽ തൻ്റെ പ്രതിനിധികളായി നിശ്ചയിച്ച മനുഷ്യർ സൈദ്ധാന്തിക നിർമ്മാതാക്കളാണ് എന്നതാണ് വിശേഷാൽ ഉൽപ്പന്നത്തിൻ്റെ സവിശേഷതയായി ഖുർആൻ എണ്ണിയത്. അക്കാര്യത്തിൽ മാലാഖമാർ സ്വന്തം ബലഹീനത വെളിപ്പെടുത്തുന്നതും തുടർന്ന് ഖുർആൻ ഉദ്ധരിക്കുന്നു.

الرحمن علم القرآن خلق الإنسان علمه البيان( سورة الرحمن )

ഈ വചനത്തിൽ ഉപര്യുക്ത ആശയത്തെ കൂടുതൽ പ്രതിഫലിപ്പിക്കുന്ന ഭാഗം നിങ്ങൾക്ക് മനസ്സിലായിട്ടുണ്ടാവും . മനുഷ്യനെ സൃഷ്ടിച്ചു എന്നതിന് ശേഷം അവന് ആശയസംവേദനം അഭ്യസിപ്പിച്ചുവെന്നാണ് അല്ലാഹു പറഞ്ഞത് . ഭാഷ ഉപയോഗിച്ച് കൊണ്ടുള്ള ആശയവിനിമയത്തിനാണ് ബയാൻ എന്ന് പറയുക.

in box :  മനുഷ്യനെ ( الإنسان ) മുസ്‌ലിം ന്യായശാസ്ത്ര ( علم المنطق ) പണ്ഡിതന്മാർ  حيوان ناطق അഥവാ സംസാരിക്കുന്ന ജീവി എന്ന് നിർവ്വചിച്ചത് കൃത്യമാണെന്ന് മനസ്സിലാക്കാം .

വിശേഷബുദ്ധിയുള്ള ജീവി എന്നാണതിന് വിശദീകരണം നൽകാറുള്ളത് , കാരണം പരസ്പര പൂരകങ്ങളാണവ .

ഭാഷ മനസ്സിലാക്കാനും ഭാഷാനിയമങ്ങൾ നിർദ്ധാരണം ചെയ്യുക തുടങ്ങിയവ വലിയ ബൗദ്ധിക വ്യവഹാരമാണ് .

നിഘണ്ടു നിർമ്മാണമാണ് ഏറ്റവും വമ്പിച്ച സാഹിത്യ പ്രവർത്തനം എന്നഭിപ്രായപ്പെട്ട സാഹിത്യനിരൂപകരുണ്ട്.

ഇന്ന് മനുഷ്യർക്കുള്ള സംഭാഷണചാരുത പരിണാമം വഴി ഉണ്ടായതാണെന്ന് തെളിയിക്കാൻ തക്ക മധ്യമഘട്ടങ്ങൾ ( Intermediate stages ) നരവംശശാസ്ത്രത്തിൽ അജ്ഞാതമാണെന്നും അതിനാൽ മനുഷ്യന് ഭാഷണ സിദ്ധി ഏതോഘട്ടത്തിൽ ഒറ്റമാത്രയിൽ ലഭിച്ചതാവാനാണ് സാധ്യത എന്നുമാണ് ഏറ്റവും പുതിയ ഭൗതികവീക്ഷണം പോലും .

നാം ഈ അധ്യായത്തിൽ  ഇസ്‌ലാം പ്രാപഞ്ചത്തെയും പ്രകൃതിയെയും മനുഷ്യനെയും കൃത്യമായി വ്യാഖ്യാനിച്ച ദർശനമാണെന്ന് മനസ്സിലാക്കി. 

ആശയപരമായി മനുഷ്യന് സ്വയം തോന്നുന്ന ചോദ്യങ്ങൾക്ക് ഇസ്ലാം ഋജുവായ ഉത്തരം നൽകുന്നു.

ഇസ്ലാമിൻ്റെ ഈ തത്വമസിയെ നിരാകരിക്കുന്ന ഭൗതികവാദിയോട് നമുക്കൊരു ചോദ്യം ചോദിക്കാനുണ്ട് .

മനുഷ്യൻ്റെ ധാർമ്മിക ബോധവും സത്യദീക്ഷയുമൊക്കെ അല്ലാഹുവാൽ സൃഷ്ടമായതാണെന്നാണ് നമ്മുടെ വാദം .

മറിച്ച് മനുഷ്യസമൂഹത്തിന് നടേപ്പറയപ്പെട്ട സത്യം , നീതി , കരുണ തുടങ്ങിയ മൂല്യങ്ങൾ ഉത്തമമാണെന്നും അവയുടെ വിപരീതങ്ങൾ അധമമാണെന്നും മനസ്സിലായതെങ്ങനെ ?

ഇതിനവർക്ക്  പറയാനുള്ള ഉത്തരം ;

പരിണാമപരമായി അതിജീവനത്തിന് സഹായകമാവുന്ന ഉത്തമമൂല്യങ്ങൾ മാത്രം  നിലനിർത്തപ്പെട്ടു എന്ന വിചിത്രവാദമാണ് . അപ്പോൾ രണ്ട് ചോദ്യങ്ങൾ വീണ്ടും ഉയരുന്നു .

ഒന്ന് : പിന്നെങ്ങനെയാണ് അതിജീവനത്തിന് സഹായകമല്ലാത്ത അധമമൂല്യങ്ങൾ ഇന്നും നിലനിൽക്കുന്നത് ?

രണ്ട് : അസത്യം , അനീതി , ക്രൂരത തുടങ്ങിയ അധമ മൂല്യങ്ങൾ എന്ത് കൊണ്ട് മനുഷ്യ വംശത്തിന് അതീജീവന സഹായികളായില്ല എന്ന് പറയുന്നതിൻ്റെ ന്യായം എന്താണ് ?

ശരി ഇസ്ലാമാണ് എന്ന് നമുക്ക് ജോല്യമായതിനാൽ ഇനി നമുക്ക് ശരിയല്ലാത്ത തത്വങ്ങളോട് ശരിയായ നിലയിൽ ചോദ്യങ്ങൾ ചോദിച്ച് പഠിക്കാം .

അനുബന്ധം :

روى البخاري ومسلم عن أبي هريرة، رضي الله عنه، قال: قال النبي صلى الله عليه وسلم: ما من مولود إلا يولد على الفطرة، فأبواه يهودانه أو ينصرانه، أو يمجسانه، كما تنتج البهيمة بهيمة جمعاء، هل تحسون فيها من جدعاء 

പരാമൃഷ്ട ആശയങ്ങൾ പ്രതിഫലിക്കുന്ന ഈ പ്രവാചകവചനത്തിൻ്റെ അർത്ഥവും ആശയവും മുകളിൽ വിശദീകരിക്കപ്പെട്ട ആശയത്തെ ബലപ്പെടുത്തുന്നു .

താഴെ പറയുന്ന വചനങ്ങൾ ഇസ്ലാമിൻ്റെ കോസ്മോളജിക്കൽ വീക്ഷണം അനാവരണം ചെയ്യുന്നു. 

وما  تَكُونُ فِي شَأْنٍ وَمَا تَتْلُو مِنْهُ مِن قُرْآنٍ وَلَا تَعْمَلُونَ مِنْ عَمَلٍ إِلَّا كُنَّا عَلَيْكُمْ شُهُودًا إِذْ تُفِيضُونَ فِيهِ ۚ وَمَا يَعْزُبُ عَن رَّبِّكَ مِنو مِّثْقَالِ ذَرَّةٍ فِي الْأَرْضِ وَلَا فِي السَّمَاءِ وَلَا أَصْغَرَ مِن ذَٰلِكَ وَلَا أَكْبَرَ إِلَّا فِي كِتَابٍ مُّبِينٍ (يونس 61)

ٱلرَّحۡمَٰنُ عَلَّمَ ٱلۡقُرۡءَانَ خَلَقَ ٱلۡإِنسَٰنَ عَلَّمَهُ ٱلۡبَيَانَ ٱلشَّمۡسُ وَٱلۡقَمَرُ بِحُسۡبَان وَٱلنَّجۡمُ وَٱلشَّجَرُ يَسۡجُدَانِ( سورة الرحمن )

وَلِلَّهِ يَسْجُدُ مَن فِي السَّمَاوَاتِ وَالْأَرْضِ طَوْعًا وَكَرْهًا وَظِلَالُهُم بِالْغُدُوِّ وَالْآصَالِ

قُلْ مَن رَّبُّ السَّمَاوَاتِ وَالْأَرْضِ قُلِ اللَّهُ ۚ قُلْ أَفَاتَّخَذْتُم مِّن دُونِهِ أَوْلِيَاءَ لَا يَمْلِكُونَ لِأَنفُسِهِمْ نَفْعًا وَلَا ضَرًّا ۚ قُلْ هَلْ يَسْتَوِي الْأَعْمَىٰ وَالْبَصِيرُ أَمْ هَلْ تَسْتَوِي الظُّلُمَاتُ وَالنُّورُ ۗ أَمْ جَعَلُوا لِلَّهِ شُرَكَاءَ خَلَقُوا كَخَلْقِهِ فَتَشَابَهَ الْخَلْقُ عَلَيْهِمْ ۚ قُلِ اللَّهُ خَالِقُ كُلِّ شَيْءٍ وَهُوَ الْوَاحِدُ الْقَهَّارُ( الرعد 15)

أَلَمْ تَرَ أَنَّ اللَّهَ يَسْجُدُ لَهُ مَن فِي السَّمَاوَاتِ وَمَن فِي الْأَرْضِ وَالشَّمْسُ وَالْقَمَرُ وَالنُّجُومُ وَالْجِبَالُ وَالشَّجَرُ وَالدَّوَابُّ وَكَثِيرٌ مِّنَ النَّاسِ ۖ وَكَثِيرٌ حَقَّ عَلَيْهِ الْعَذَابُ ۗ وَمَن يُهِنِ اللَّهُ فَمَا لَهُ مِن مُّكْرِمٍ ۚ إِنَّ اللَّهَ يَفْعَلُ مَا يَشَاءُ ( الحج18)