ഖുർആനിൽ ധാരാളം നിമിഷമുദ്രകളുടെ ചിത്രങ്ങളുണ്ട് . മനുഷ്യചരിത്രം കടന്നുവന്ന ഘട്ടങ്ങളുടെ ചിത്രശാല , നിറം മങ്ങാത്ത ആൽബമായി ഖുർആനിലുണ്ട് . സൗന്ദര്യബോധവും ചരിത്രബോധവും ആവിഷ്ക്കരണവും ഒന്നിക്കുന്ന ശക്തിക്കൊത്ത് അവ മങ്ങാം ,മിന്നാം .

എന്നെ സംബന്ധിച്ചേടുത്തോളം ഖുർആനിലെ ഏറ്റവും ഭാവപ്പറ്റുള്ള Photogenic രംഗം അധ്യായം നജ്മിലെ പതിനേഴാം വചനമാണ് , വ്യാഖ്യാനഭേദങ്ങൾ ഉണ്ടെന്നറിയേ തന്നെ .

നിശാകാശ പ്രയാണമാണ് സന്ദർഭം , 

സൃഷ്ടികളെ - മുഹമ്മദും മുഹമ്മദല്ലാത്തതും എന്ന് അല്ലാഹു രണ്ടാക്കിയ രാത്രിയാണത്. 

സീനാ കുന്നിഞ്ചെരുവിൽ ചെരിപ്പൂരി നിൽക്കുന്ന മൂസാ പ്രവാചകന് മുന്നിൽ അല്ലാഹു എഴുപതിനായിരം മറകൾക്കപ്പുറം തൻ്റെ ജ്വാല പ്രകാശനം ചെയ്തിരുന്നു , മലപൊടിഞ്ഞും പോയി ,തൗറാതിൻ്റെ നബിയുടെ ബോധവും പോയി.

ഇവിടെ , ബുറാഖിലേറി മക്കത്തെ മുഹമ്മദിൻ്റെ ഉഠയനമാണ് ,പ്രൈവറ്റ് സെക്രട്ടറിയായി പറക്കുന്നത് ജിബ്രീരീലാണ്. പാദുകം തൃപ്പാദങ്ങളിൽ തന്നെ. പടപ്പുകൾക്കിറക്കപ്പെട്ട ജ്ഞാനങ്ങളിൽ പറഞ്ഞ ലോകങ്ങളൊക്കെ എപ്പോഴോ തീർന്നിരിക്കുന്നു . പ്രകാശവും പ്രകാശവും തുടരത്തുടരേ തിരതല്ലുന്ന വെളിച്ചത്തിൻ്റെ കടൽക്കരയിലെത്തിയപ്പോൾ ജിബ്രീൽ ,ബുറാഖിൻ്റെ കടിഞ്ഞാൺ വലിച്ചു. 

കാലം കായ്ക്കുന്ന കൽപ്പകവൃക്ഷം - സിദ്റതുൽ മുൻതഹയിലെ വളളിപ്പടർപ്പുകളിൽ തൊട്ടുരുമ്മി അവരിറങ്ങി. 

മലക്ക് പറഞ്ഞു ,

"ഇവിടന്നങ്ങോട്ട് ഒരംശം കയറിപ്പോവാൻ എനിക്ക് അനുമതിയില്ല ,എൻ്റെ ലോകം ഇവിടെ തീരുകയാണ് , ഇനിയങ്ങോട്ടങ്ങ് ഒറ്റക്ക് സഞ്ചരിച്ചാലും " .

നബിയാൽ മാത്രം കാണപ്പെട്ട ലോകങ്ങളാണിനി , അല്ലാഹുവും അവൻ തെരെഞ്ഞെടുത്ത ഒരു മനുഷ്യനും മാത്രം .

താരാപഥങ്ങൾക്ക് മീതെ ആ ഒരേയൊരാൾ നടക്കുകയാണ് !

വഹ്യിൻ്റെ ഉറവിടത്തിനടുത്ത് ഭൂമിയിലെ പാദരക്ഷയോ !

ഇങ്ങേത്തലക്കലിൻ്റെ അങ്ങേയറ്റവും കടന്ന് അങ്ങേത്തലപ്പിലാ ഒരാൾ ,

യുഗപ്പകർച്ചകൾ കറങ്ങിമറിയുന്ന ചക്രം കണ്ടു ,

ഉദയാസ്തമനങ്ങളിൽ നിറം വീഴ്ത്തുന്ന ഛായപ്പീടികയും കണ്ടു ,

പുറപ്പെട്ടതൊക്കെ ചെന്നണയുന്ന ,വന്നണയുന്നതൊക്കെ പുറപ്പെടുന്ന

കണക്കുകിതാബും കണ്ടു .

അതിനിടയിൽ സ്വർഗവും നരകവും അതും കണ്ടു .

ഒടുവിലാ കുർസിയ്യിൻ്റെ കാലിൽ തൂക്കിയ ഖദറ് വരഞ്ഞ ഖലം തൊട്ടും നോക്കി മൊഴിഞ്ഞു ,

"നീയല്ലാതെ ഒരിലാഹ് വേറെയെങ്ങനെയുണ്ടാവാൻ " .

കണ്ണിലൊതുങ്ങാത്തവയിലൂടെ കാഴ്ച്ചകളും അറിവിലൊതുങ്ങാത്തവയിലൂടെ അനുഭവങ്ങളും ഒഴുകുകയാണ് , നബിക്കായ് അവയെ അണിയിച്ച് വെച്ചതോ , അണിയിച്ചൊരുക്കപ്പെട്ടതിലേക്ക് നബിയാനയിക്കപ്പെട്ടതോ , അജ്ഞാതം .

സൈനിക പരേഡ് വീക്ഷിക്കുന്ന 

സേനാനായകൻ്റെ ,രാഷ്ട്രത്തലവൻ്റെ ഗാംഭീര്യത്തോടെ ,പക്വതയാർന്ന പടത്തലവനെപ്പോലെ ആ സംവിധാന വ്യൂഹങ്ങളെല്ലാം കണ്ട്കൊണ്ട് തലയെടുപ്പോടെ നിന്ന മഹാമുഹമ്മദിന് നേരെ അസ്റാറിൻ്റെ ക്യാമറ രണ്ട് വട്ടം കണ്ണ് ചിമ്മി.

അല്ലാഹു പോലും കൗതുകം കൂറിയ ഒരു സ്റ്റിൽചിത്രം തെളിഞ്ഞു ,

ഫോട്ടോപോസിംഗ് അസാധ്യം !

مَا زَاغَ الْبَصَرُ وَمَا طَغَى (സൂറ നജ്മ് - 17 )

"കണ്ണ് മഞ്ഞളിച്ചുമില്ല , 

അറ്റൻഷൻ തെറ്റിച്ചുമില്ല "

ജന്നാതുൽ ഫിർദൗസിൻ്റെ ബാൽക്കണിച്ചുവരിൽ ആ ചിത്രം തുക്കിയിട്ടിട്ടുണ്ടാവുമോ !

സ്വല്ലല്ലാഹു അലാ മുഹമ്മദ് സ്വല്ലല്ലാഹു അലൈഹി വ സല്ലം .