താനൂരെപ്പള്ളീലെ മുദരിസായി വെളിയംകോട് ഉമർ ഖാദി കിതാബോത്തും ബൈത്തെഴുത്തുമായി ജീവിക്കുന്ന കാലം .

തറവാടിത്തവും പ്രമാണിത്തവും മാടമ്പിത്തരവും മാപ്പിളമാർക്കിടയിലെ മുന്തിയവരെയും പിന്തിയവരെയും തീരുമാനിച്ചിരുന്ന കാലം .

ഒരു ദിവസം , ഖാദിയാർ പള്ളിക്കകത്തിരിക്കുമ്പോൾ പുറത്ത് പൊരിഞ്ഞ കച്ചറയും വായക്കേടും .

മുറുക്കത്തിനിടെ , കൂട്ടത്തിൽ മൂപ്പൻ പ്രതിയോഗിക്ക് മുമ്പിൽ ആ അടവ് പുറത്തെടുത്തു ;

" ൻ്റെ തറവാടേതാണെന്ന് ജ്ജറിയോ വെടക്കനേ " ..

ഉമർഖാദി അപ്പപ്പോഴത്തെ കവിയായിരുന്നു ,കാത്തിരുന്ന് വരി വരുത്തുന്നതല്ല . ചുവരിലെഴുതി ,

أيا فاخراً بالنسب كيف التفاخر              

وأصلكمُ من قبل تِيّن ونايرُ

وآشارِ وموشارِ ومنّانُ بانرُ                    

وكُيْبان شدِّي وناياد بَرَيَرُ

" തറവാടിത്തം പറഞ്ഞ് മേനോനാവുന്ന പഹയാ , എങ്ങനെ സാധിക്കുന്നു !

നിൻ്റെ തന്തയല്ലെങ്കിൽ തന്താൻ്റെ തന്ത വല്ല തിയ്യനോ നായറോ ആശാരിയോ മൂശാരിയോ പാണരോ പറയറോ നായാടിയോ മണ്ണാനോ

ആരുമാവാമെടോ "